لمبة…
فى تقاطع شارع صبرى مع الكورنيش
فى تقاطع شارع صبرى مع الكورنيش
بتعلّق خيالات العتمة
فى شمّاعة الناصية
سخّنت المكوة
وعملت طريق للبحر ف قلب الفستان
اتهزّت هزّة خفيفة
وقالت
مش كل النار
تنفع للنور
قُلت لها
كسرة
ورا كسرة
ورا كسرة
بتوهب للشكل قيافتُه
فيحاور عذابات النسمة
بكرانيش الرحمة
ابتسمت
بسمة منديل
بيرفرف على حالُه
وقالت:
ماينوب الحالم
غير حرق صوابعُه..
.
.
*أديب وشاعر – مصر
*لوحة الفنان التشكيلي مهند صبح- سوريا
-لمتابعتنا على فيسبوك: https://www.facebook.com/alwasatmidlinenews
