عندي لسّه فـ قلبي حتّة قلب
بتنادي دايمًا ع اللي دايمًا يغيب
وعندي فوق الحزن كومة حزن
دايمًا أخبّيها لو صادفني غريب
زهقت احوِّش في عمري ينقص في ناحية يزيد
على شعرى كبشة قطن بتشاور على التنجيد
رجليّا تجري لورا والعين على قُدّام
زي اللي لابس قميص لكن بدون اكمام
زي اللي دايمًا تفوته صلاة العيد
عوَّرت قلبي بالخيال وما عادش ميكروكروم
وعشت يوم ورا يوم وأنا راضي بالمقسوم
كوميدينو وسط الكراسي وفوقه حصّالة
هيّ دى روحي اللي بتشبه الصالة
وفـ ركن منها تلاقيني قاعد ساعات واقف
شبه اللي ناسي يكتب الواجب
بردان وخايف والشفايف زرقا
نفسه في مرّة يقول ماهيش فارقة
وكل ما يشوط كورة بتيجي في العارضة
وكل ما يقول بكرة يبقى النهارده
وفـ روحه تدبل وردة ورا وردة
والناس تقول له بس ليه زعلان!
ما افرحش إلا.. لمّا اشوف البنات
المريمية والنبيّة وشفشق الشربات
ما افرحش إلا و«مرام» و«رماز»
فى حضن «مريم» يدوبوا سكّر نبات
وساعتها بس.. أحس إنى بنيت
ما افرحش إلا و«نديم»
قاعد هنا في البيت
عمال يدخّن من سجايري معايا
وساعات بنضحك قوى من هَمْ كَلْفِتنا
ما افرحش إلا و«فاطمة» كعبتنا
بتدّفي بيتنا بوِرْدها الطيّب
فرجك قريب يارب ديم ضحكتنا
عيسى اللي وسّع مكانه فـ قلب لمّتنا
زى الريحان نعسان على الكنبة
شوف القمر بيّت على العتبة
شوف القمر بيبص م الشُرّاعة
الحزن متعلّق على الشماعة
خليه شويّة لوقت تاني بعيد
طبطب بحنيّة على التجاعيد
وسيبني ارّيح بس لو ساعة
.
*شاعر مصري- رئيس التحرير والمشرف العام لدى Sonata news
.
