“النار بالنار”.. مواجهة جريئة بين كاريس بشار وجورج خباز
تصدّرت المواجهة الدرامية التي جمعت بين النجمة السورية “كاريس بشار” والممثل اللبناني “جورج خباز” ضمن مشهد من مسلسل “النار بالنار”، حديث روّاد مواقع التواصل الاجتماعي في سوريا خلال الساعات الماضية.
ويظهر المشهد استياء النجمة كاريس بشار، التي تؤدي دور “مريم” في المسلسل، من يافطة معلقة في الشارع كُتب عليها “يمنع تجوال السوريين بعد الساعة الثامنة مساء”، وهو ما يثير غضبها لتدخل في مواجهة كلامية حادة مع جورج خباز (عزيز) الذي كان يقف بالقرب منها.
كاريس بشار تواجه عنصرية جورج خباز..
وفي الحوار، الذي يلقي الضوء على ظاهرة “العنصرية“، يقول عزيز لـ مريم: “انتو جايين هيك وقحين ما عندكن جنس الحيا، إلك عين تحكي إنت؟ ماضيكن معنا بشع وحاضركن على أبشع، أنا محلك بحط راسي بالأرض”.
لترد عليه “مريم” بالقول: “أول شي مو نحنا اللي جيناكم بكيفنا، أنتو اللي بعتو ورانا، وتاني شي لولانا كنتو هبرتو بعض”.
“عزيز” أكمل حواره قائلاً: “نحن بعتنا وراكن على أساس قوات ردع عربية صار بدو مين يردعكن، قعدتو عنا 30 سنة عم تردعوا مدري مين ومدري شو، بعدين لما خلصت الحرب بقيتوا ميّقطين على قلبنا متل الكابوس، شو بتعرفي عن المدفون، شو بتعرفي عن ضهر البيدر، عن عنجر؟ انت شي مرة قاعدة على ربطة الخبر لما يقشطك ياها ابو سن دهب تبع الحاجز، كنا اذا اخدنا نفس يشلحونا نصوا، إلك عين تحكي كمان”.
لتعود “مريم” بالقول: “ما بدها كل هالموشحات، حمل حالك ونزال عالشام وورجينا المراجل، ليقاطعها هو قائلاً: “ما بدي انزل عالشام، روحي أنت عالشام”، قبل أن يختتم المشهد باستهزاء مريم من عزيز بالقول: “وينك يا ردع بيكتبوها سوريين مو سوريون يا مثقف يا فهيم يا فينيقي”.
وحظي المشهد بتفاعل واسع من قبل رواد مواقع التواصل الاجتماعي الذين تداولوه على نطاق واسع، حتى تصدر اسم بطليه إضافة إلى اسم المسلسل “النار بالنار” قائمة الأكثر تداولاً على مختلف المواقع، مع تعليقات يعبر من خلالها أصحابها عن إعجابهم الكبير بأداء النجمين بشار وخباز.
