استراتيجية الشاكرية ..

قاعدين انا وهالديك بالبرد .. عم تكتك تحت الحرام ونقرأ بهالبوستات .. ماشفنا الا موجات من الانتقادات هاجمه على هالفيس .. شي ريبورتاج لصحيفة وطنية عم تحاول تعمل ترند انسانية وتعزم المواطنين على الشاكرية، وشي على شحنة نفط وصلت بالسلامة على المينا بعد ما طلعت عيونها بالطول وبالعرض من القراصنه الأميركان باليونان لتأكيد انو الدول الصديقة ماتخلت عننا، وانو صمودنا بوجه البرد والعتمة والجوع ..اي الجوع في حدا حاسس فيه ..

بعد هالأخبار ماشفت غير هالديك دق فيه الحماس ونفض حالو من تحت الحرام وقلي: دخلك والحكومة ماعملتلها شي عزيمة كمان على شرف وضعنا اللي التعن .. قلتلو إهدا وبلاتخبيص .. إي شو بدها تلحق الحكومة لتلحق منين بدها تجيب حوامل طاقة لعزيمتك المحبطة .. نحنا بحرب جوا البلد وفي حرب أوكرانية كمان .. لك حتى الأوروبيين عم يعملوا تقنيين وبطلوا يبعزقوا طاقاتهم يمين وشمال وصاروا يشربوها (ريد بول ) ..

اطلع فيني الديك وقلي : القصد يافهمان انو نحنا نتفقد الحكومة .. بلكي تحسسنا إنها موجودة .. اي والله خايف يكون صار عليهن شي لاحس ولاخبر .. وخاصة انه الحس انعدم على الأخير .. لك اتخيل نزلوا مخصصات البنزين تبع سياراتهم ونحنا من غير شي مامنشوفهم .. هلىء ماعد نحس حتى بوجودهم .. ماعندهن بينزين يتفقدونا .. اتصل يا اخي إسأل عنهم .. اعزمهم على شاكرية مثلاً .. خلينا نعرف أخبارهم .. إي مافي إلا اخبار بردنا وجوعنا وفضايحنا على منصات التواصل .. شي شو بتحب تاكل .. وشي برنامج اشحد واربح معنا  ..

نطيت وقلتلو: إي وأنا منين بدي جيبلهم شاكرية .. لا كهربا ولا غاز اطبخلهم .. والميزانية مابتكفي حق الخبزات .. هدول مابيلكلو الشاكرية الا بالموزات .. التفت وقلي بكل خباثة: لك خلي الزميلة الإعلامية تبع الصحيفة اللى عم تعزم المواطن تعزم المسؤول .. مو هيك المفروض إنو هي تعزمهن وتسألهم عن احوالهم .. نحنا أحوالنا صارت معروفة بس يطمنونا عنهم .. بلكي الصحيفة على قعدة رواق بتفهم منهم هل رح يضل الوضع ماشي أكتر الى الوراء ام في تحسن بعد شحنة هالنفط؟ ..

طمنته وخبرته أنو هي بتعرف .. قصدي الحكومة بتعرف إنو مافي وراء أكتر من هيك .. وإنو الشاكرية بدك تضل تحرك فيها يمين وشمال وتلهيها لحتى ماتفرط .. ومقارنة مع وضعنا هيك عم يصير فينا ماعنا مجال نفرط .. فهمت هلىء ليش عم يعزمونا على شاكرية؟ .. تاريها طبخة استراتيجية !!!

اقعود وكِن أحسن ما أطبخ عليك شاكرية يا ديك الوسط ..

عن جد شهيتونا الشاكرية في كهوف العتمة والبرد !؟.

قسم “الديك الفصيح” في الوسط .. 

إقرأ أيضاً .. جن الرَّبع !!..

إقرأ أيضاً .. قال “دولة مؤسسات” قال !! .. “فيفتي فيفتي”

صفحتنا على فيس بوك – قناة التيليغرام – تويتر twitter