أبني في صرحه … فهد عافت الشمري
قالت وش العلقم الترياق؟
ومحدٍ ضمادة سوى جرحه
كل اللقا لو نظرت فراق
وكل البكا من ورا فرحة
محدٍ ربح كود لما باق
محدٍ خسر كود من ربحه
مابه خلوق وعديم أخلاق
للكل نسبة من الصحه
يا شاعري والوهم حرّاق
أجدى من مصافحة ذبحه
خذها حقيقة من الأعماق
صدرك هو اللي طعن رمحه
ما في الكتابة جديد آفاق
كم تشبه الكسرة الفتحة
قلت اسمعيني صوتي تاق
يجمع لك الكل في شرحه
إن قلت بعض الفراق عناق
أو قلت بعض الكفن طرحه
لأني بكاذب ولا آفّاق
لكنها النظرة السمحه
أكبر خطا إننا نستاق
تعريف للبحر من ملحه
أنتي اتبعيني.. أنا أوراق
أو تهجريني.. أنا صفحه
للشعر للحب للأشواق
لليل في داخله صبحه
بيني وبين القلم ميثاق
يهدّني.. وأبني في صرحه
ذي راحتي واسألي العشاق
العاشق كتابته مسحه
