أحمد الخدرجي ..
لو كان العالم بيحبك
كان بص لتفاصيلك حبه
كان شافك وانت بتتحمل
موت الأحلام حبه بحبه
كان شاف الضحكه اللي ف روحك
عَمَّاله تعجز ف شفايفَك
صدقني العالم مش شايفَك
***
***
حتفَرَّق مزيكا الليله على كل الناس
على كل السكك اللي اتعصرت حواديت ف الروح
حتسيب مزيكا “بليغ” ع البحر
وحتاخد أي عصا من الشارع ترفعها
وكأنَّك…….. قائد أوركستر
حترَقَّص كل الكون بإيديك
ع التانجو اللي ف آخر كوبليه من “ليلة حُب”
***
***
لو كان العالم بيحبك
كان شاف المشهد بالكامل
كان شافك وانتَ بتتحَوِّل
من شاعر شاطر لمقاول
***
***
زعلان؟؟
على إيه
طول عمرك فاشل مُتَهوِّر
مش حاجه جديده عليك يعني
مهزوم؟؟
ماهو عادي انك تخسر
لأ مش بالظبط
سيبك من عالم بيحاربك
من إنك مظلوم ف اللعبه
من إن الجمهور مش فاهمك
من إن البنت اللي اتحدفت بالصدفه عليك
كات طَرْح شيطاني وشُغل جنون
مهزوم؟؟ عادي
من آخر ماتش انت لعبتُه
كان فيه قُدّامَك 100 فرصه وماجبتش جون
ماتلومش على العالم تاني
ماتلومش على الحرب الباردة
طبطب على نفسك واخدعها
بالكلمة اللي تملي تقولها
حنعوض في ” لقاء العودة”
***
***
لو كان العالم بيحبك
كان سابلك حاجه من الشارع
مش حِتِّة بلكونه وحيده
بتغني ويعمل مش سامع
***
جواك تفاصيل بتعيطلَك
قولَّها ” معلش” وحتقولَّك
عيط وبادلها ” المعلشات”
سيبلها مزيكا بتعشقها في الخلفية
واقرالها كلامك عن قسوتها ف آخر شات
مع سرب بنات
كان طاير يوم فوق بلكونتك
وبيحدف عنقود ابتسامات
جواك تفاصيل / مرعوبة وخايفة من الدعوات
حتى الدعوات!!!
رَبَّك على عرشُه بيستَنَّى دعوات تانيه
إتمرد وابعت للسماوات
دعوات أحلى
دعوات أجدد
دعوات تدهش كل الماشيين ف شوارع فوق
ولَّا انت استسلمت لعالم كلاسيكي خلاص؟!
حتقولُّه “يارب”؟؟
ماهي كُل الناس بتقولُّه يارب
وانت اللي شهدت من الأول
من أول وقعه على سريرك
على إنُّه الرب
رب التفاصيل
رب الأحلام اللي ف روحها
رب الشربات اللي مغَرَّق ورد السجاده من الفرحه
رب الجلاليب اللي محاوطاك وبتدعيلَك وبتنصح فيك
– إسمع كلام امك وما تسمعش كلام…… معرفش
رب الغُربال
والدوخه اللي انتَ حتورثها
م اللفَّه الأولى ف قلب الدايره لغيت دلوقت
حتقولُّه يارب
إنت اللي بكل مافيك شاهد
على إنه الرب
حتخلي الأسماء الحسني
عصافير انطَلَقِت من خوفَك طالعه السماوات؟!!
ماهي كل الناس حافظه الأسماء
بسم الرحمن
كائن دلوقتي بيكتبلَك
مش عارف عايش أو ميت أو بين الاتنين
عَمَّاله دموعُه بتتهَجَّى فوق الخدين
أخطاء العالم
من أول تفاحة آدم
ولغاية ما اتسرقت مِنُّه..
صورتُه اللي اتصدر منها براءه لكون مُجرم
فاحترف الإجرام بسهوله
واتحرقت صورتُه المسكونه بمدرسة “العطف”
والروح الحلوه ف سنه أولى
بسم اللي تجلَّى ف ملكوتُه
بالعفو لدرجه تخلي شيطان زعلان م الخُلد
وبيلمح كُم حرير بنوته بتتمشى ف الجنه العصر ف أحلامُه
بسم اللي انا واقف قُدَّامُه
على طرف السجاده وبابكي
وبعيط ودموعي بتحكي
أنا خايف جداً م العالم
والعالم جداً بيحبك!!
.
*شاعر من مصر*اللوحة للفنان التشكيلي بسام بيضون– سوريا
