(أرجوك سكّتني يا فرق السن
يا جنان وفايتني لوحدي أحن)
إدّيني نظرة
يا خفيف الروح
الحضرة خضرا
ودافية بالأوراد
شمّرت قلبي دخلت نفسي أبوح
مِد المدد وادّي الولد ما أراد
الجرح سلّم لليالي جروح
والوَرد حَضَن الوَرد في الإشارات
مين اللي جاي دلوقتي مين بيروح
وسايبني أبني الحلم م البدايات
وسايبني أرقص زي طير مدبوح
ترميه حلاوة الروح على ملتقى الحكايات
***
إدّيني نظرة بس والمحني
القلب أخضر لسّه مش محني
لكن ماهوش الولي ولا صاحب الكرامات
سايق عليك الغرام والعشق ريّحني
أنا في مقام الخصام واقف ع العتبات
فرّحني مرة وبعدها ادبحني
خلّيني أنسى من الأسامي بنات
سِرب الفراش اللي عاش عمره يجرّحني
سوسن تهاني دُعا زينب وهالة حياة ( !)
.
