“قلوب مليانة أعشاش” .. سمير خليفة

الأيد لْ ما فِيا غير خمس صبيع إيد فاضيه!
* المرا اللي بيمرَض قلبا وما بيعود صالح لَ الحبّ
رح تضلّا تْحس في قفص نحاس ع صدرا
وحمل حطب يابس ع كتافا.
* ما في مرَا بلا قلب !
في قلب ناقصو مرَا ت يعيش..
ناقصو مرَا ت يحمل عصاتو ويقوم يمشي.
* المرَا منّا قصيده، بتصير قصيده بس تنام ع إيد شاعر
بس تصير ترجّف ورقة الشِعر هيي ومارقه بين صابيعو
هيي وحاملي السيف
مش ت تقصّ راس الحيّه، ت تقلّو فيك بالسيف تربح حرب
بسّ ما فيك بالسيف تربح مرا قلبا مليان عشاش وجوانح بيضا.
* فيك بالسيف تْشقّ الصخر وتعمل منّو تمثال
بس ما فيك تعمل منّو وردِه
وتطيلَع منّو فراشه!
* بيقولو الحبّ مفتاح القلب! الحبّ هوّي القلب..
القلب بسّ يتركّبلو بواب وشبابيك وينصبّلو مفاتيح بيصير حبس
بيصير مستودع حطب، بيصير برّاد تلج.
.