غصة بالقلب … مريم النقبي
في عيوني دمع حاير من سنين
وفي فوادي غصّةٍ ما بِحْــتَها
والغمامة اللي غِشتْ عين وجبين
حان وقتٍ به قويت وزِحْتَها
و الهموم اللي نصَتْني كل حين
من وسط صدري أنا سرّحْتها
كل ما قلت أنّها باكر تزين
تمسي جروحي وانا صبّحْتها
والمشاعر لي بها قلبي يدين
كم ليله زاد شوقي و صِحْتَها
كنت أظن القلب صامل ما يلين
لين شفتك و الخطى زحْزَحْتَها
وقصتي لي اسمها “الناي الحزين”
في خيالي صغتها و مَسْرَحْتها
كلّها وجد و تفاصيل وحنين
ولجل ترضى زدتها ونّقّحْتَها
في زوايا الذاكره عطرك خنين
و ذكرياتك مول ما بَارَحْتها
آنا عندي حدس وإيمان ويقين
ان لك أسرار ما لَمّْحْتَــها
وفي عيونك دمع حاير من سنين
و غصّةٍ بالقلب ماقد بحْتَها
.
.
*شاعرة من الإمارات
.
لمتابعتنا على فيسبوك: https://www.facebook.com/alwasatmidlinenews
