رقص السوريين على إيقاع الحالة النفسية ..
|| Midline-news || – الوسط …
رغم انقطاع علاقة الديك الفصيح بالرقص .. ورغم انو من سنين نسي الهز والفقص .. إلا انو الذاكرة بترجع بالديك لأيام التميز المدرسية .. ومعسكرات الصف العاشر العسكرية.
فالديك يا سادة يا كرام مع انو كان من المتميزين بالرقصة الروسية المشهورة بالقوة .. أو ما يسمى بـ “التمرين التاسع – خود وضع” في دروس الفتوة .. إلا إنو الديك الفصيح .. ما تمالك حالو وانتقل من الرقص الروسي للرقص التعبيري بعد ما سمع هالتصريح ..
حيث طالعتنا محافظة دمشق .. بتصريح بيفلق الصخر فلق .. انو قال شو .. حالة الناس النفسية هي سبب الازدحام على محطات الوقود .. لك اغيثيني ايتها القرود السود.
ما علينا .. طبعا بوسط الأزمة الي عم تعاني منها الكازيات .. ورجعة مشاهد الزحمة عالمحطات .. وفقدان المازوتات والبنزينات، من دون وجود اي تبريرات منطقية من المعنيين والمعنيات .. قالت محافظة دمشق، على لسان نائب المحافظ، أحمد نابلسي، بموضوع الزحمة على البنزين، انو المادة متوفرة وكمياتا منا قليلة .. “مع انو الناس عم تدور عالبنزين بسراج وفتيلة”.
وتابع الرجل تصريحو بانو قال انو الزحمة اللي عم تصير عالكازيات .. الها علاقة بالحالة النفسية للمواطنين والمواطنات .. اللي بمجرد ما يشوفوا طابور سيارات .. بييجيهون احساس إنو المادة رح تنقطع من الكازيات .. فبيوقفوا بالدور ليأخذو مخصصاتون .. وكأنو البنزين أكسير حياتون .. وهيك بيزيد عدد الي ناطرين بالدور وبتصير الدنيا زحمة .. وزحمة يا دنيا زحمة.
طبعا الديك بيظن وبعض الظن ليس إثماً .. انو الشعب السوري بعد هالتصريح الخارق الحارق المتفجر صار بحاجة برنامج تدريب تعدلو ياه منظمة الصحة العالمية .. لتنمية قدراتوا العقلية .. وحماية صحتو النفسية.
بس انو تعو لهون زز شو سبب هالحالة النفسية عم يسأل .. ديكنا الفصيح المبجل؟..
لك اخي المواطن فهمني ليش هالحالة النفسية .. والكهربا ما بتقطع والنت .. من أحسن ما يكون وسرعتو متل الطلقة الروسية .. و الاهم من هاد كلو انو ابن فلان وابن المعتر الغلبان بيدرسوا بنفس المكان .. وما في تفريق بينهما الاثنان.
قال الزحمة سببا الحالة النفسية .. لك نفسية مين والناس نايمين .. اذا السوريين عم يرقصوا عالوحدة ونص بلا طبلة وبلا دف .. وكأنن أكلين مية كف.
واكسكيوزمي من خاطركن يعني .. ليش إنتو خليتو عند المواطن السوري نفسية يا مسؤولين .. لك والله هالتصريح خلا الديك يصيح ما يستريح .. ولسان حالو بعد ما صار حريف بالرقص اكتر من الست نجوى فؤاد أيام عزها الله يعزكم : لا تحسبو رقصي بينكم طربا فالديك يرقص مذبوحا من الألم.
بس انو مو غريبة؟!.. ليش هيك شعبنا بيحب يعمل زحمة .. مع انو ببلدنا ما في ولا أزمة .. هاد غير انو البنزين متوفر والكازيات فاضية .. ومع هيك الناس مش راضية .. كل هاد وشعبنا نفسيتو تعبانة .. وتلافيف مخو خربانة.
آه هلأ عرف الديك ليش مضطربين الاخوة المواطنين ونفسيتن تعبانة .. يمكن لأنن عم يلعبو لعبة الحرب “ببجي” من 10 سنين .. عرفتوا كيف يا معترين؟.
