وكيف ما عْرِفتَك
حْملتَك عَ كتفي من السما عَ الأرض
جينا مشي وقْتا
وكان يوسف ناطْرَك عَ باب لِ مغاره
ومريم عم تْسلّق حطب ! وتساعدا مرتا
والمجدليي! عم ترقّص جرّتا عَ العين
تركْتَك وفلّيت! ولْحِقْتا
لْحِقت الخطيي وما عدت شفتَك
نسيت الصلا والشمع
وصندَلَك لِ زغير
وإنجيلَك وبخّور محْبَسْتَك
وباركت المسامير!
والرمح يللي نْشَك بضلوعَك!
وخزّق حبَق وعروق خاصِرتَك
بزكر شو كنت تروح لَ عنّا
تَ تدوق طعمة خبز مَعْجِنّا
وشو كنت إتمَنّى
فرّق سمك عَ الناس
وتحْمَرّ منّي عين يوحنّا
وتمشي بِ عيني وصوتَك يقللّي:
إتْطَلّع بوجّي عرفتني ؟!
كزّب وقلّك لَق ما عرفتَك
لا أنا لْ حَبّيتني!
ولا أنا لْ صلّيت! وحْمِلت مسبِحْتَك
وكيف ما عرفتَك يا ربّي كيف !!
قدّيش كنت ضعيف!
مدّيت إيدك عَ البحر جبت السمَك
جبت الحمل والديب قعّدتُن معَك
جبت الهوا والطير!
جبت الخير!
جبت الملِح عَ البيت
جبت الغصن والزيت
وحبّة الخردل !
جبت الفقر تَ تلبْسو صندل
وجبت الحبق تَ نْشِمّ
وجبت لَ العالم سرير وإمّ !!!
وكيف ما عرفْتَك يا ربّي كيف!
مدّيت إيدَك عَالصخر جبت النبع
مدّيت إيدك عَ السهل جبت الرغيف !!!
.
*قصيدة الشاعر اللبناني الكبير سمير خليفة
*لوحة الفنان التشكيلي العالمي أمير وهيب
تابعونا على صفحة الفيسبوك: https://www.facebook.com/alwasatmidlinenews
