الحكومة المظلومة للمواطن : من أين لك هذا !؟..

|| Midline-news || – الوسط …

حايص هالديك ولايص … ورايح جاي عم يضرب أخماس بأسداس …

قلتلو شبك ؟ .. عم يحاكيك الوسواس الخناس ؟..

قلي : لك ما عم أعرف منين أمن حق العلف .. طايرة الأسعار وطالعة كأنه عم نستخرج الأعلاف والحبوب من الكافيار والمرجان .. إي شو هالجنان !؟ ..

قلتو : هلق صار بدك علف وحبوب ومعلبات للجاجات ؟ .. طول عمرك عايش على الاكتفاء الذاتي .. حبكت معك الدلال بهالحصار وقيصر ترامب واحتلال البلاد من التركي والأميركي ..

صرخ فيني وقلي : ولك استحي على حالك .. قبل ما تطلب مني قنن واعتمد على الاكتفاء الذاتي .. شوف حالك منيح .. عايش أحلى عيشة براتب 50 ألف ليرة سوري بس .. فيك تقلي من أين لك هذا ؟…

فنجرت عيوني فيه وقلتلو : لك هادا قانون جديد بدهن يحاسبو فيه المسؤولين اسمه من أين لك هذا ؟…

قلي والله !!؟ .. إي يروحو يسألوا المواطن من أين لك هذا بخمسين الف ليرة ؟ .. وكيف لابس الجوخ وقاعد على الحصيرة ؟..

إذا أجار الغرفة صار ثمانين الف ليرة بالمخالفات .. وكيلو الجبنة بستة الاف .. واللبنة قريبة منها .. والزيت بمدري قديش ..

لك كيف عم يعيش وياكل ويشرب ويأركل كمان .. لأ وبتمرق قدام المطاعم مليانة .. والضرسانة .. يعني المطاعم .. ماوقفت أراكيل حتى بالكورونا .. وبتجي بدك تسأل المسؤول اللي معروف إنه عم يسرق.. من أين لك هذا !! ..

أنا برأيي اسألوا المواطن من أين لك هذا بخمسين الف ليرة سوري فقط !؟..

لك كيف قادر يعيش !؟..

قلتلو : هاد سر الاكتفاء الذاتي !!..

قلي : إي كول اكتفاء ذاتي لكااان !!..

المصدر : قِن الوسط 

http://تابعونا على صفحة الفيسبوك: https://www.facebook.com/alwasatmidlinenews